Anganwadi Workers: ఏపీలో సమ్మె చేస్తున్న అంగన్వాడీలకు ఉపాధ్యాయ సంఘాల మద్దతు

[psycopk]

Anganwadi Workers: ఏపీలో సమ్మె చేస్తున్న అంగన్వాడీలకు ఉపాధ్యాయ సంఘాల మద్దతు 

06-01-2024 Sat 21:20 | Andhra

• డిమాండ్ల సాధన కోసం సమ్మెకు దిగిన అంగన్వాడీలు
• ఎస్మా ప్రయోగించిన ఏపీ ప్రభుత్వం
• అంగన్వాడీలపై ఎస్మా ప్రయోగించడాన్ని ఖండించిన ఉపాధ్యాయ సంఘాలు

 

ఏపీలో గత కొన్ని వారాలుగా సమ్మె చేస్తున్న అంగన్వాడీలపై రాష్ట్ర ప్రభుత్వం ఎస్మా ప్రయోగించింది. అంగన్వాడీలు ఆరు నెలల పాటు సమ్మెలు, నిరసనలు చేపట్టడం నిషేధం అంటూ ఉత్తర్వులు జారీ చేసింది. ప్రభుత్వం తమపై ఎస్మా ప్రయోగించడం పట్ల అంగన్వాడీలు ఆగ్రహం వ్యక్తం చేస్తున్నారు. ప్రభుత్వ బెదిరింపులకు భయపడేది లేదని, సమస్యలు పరిష్కరించే వరకు సమ్మె చేస్తామని స్పష్టం చేస్తున్నారు. 

ఈ నేపథ్యంలో, ఏపీ ఉపాధ్యాయ సంఘాలు అంగన్వాడీలకు మద్దతు తెలిపాయి. అంగన్వాడీలపై ఎస్మా ప్రయోగాన్ని ఖండిస్తున్నామని ఉపాధ్యాయ సంఘాల నేతలు పేర్కొన్నారు. సమస్య పరిష్కరించాలంటే ఎస్మా విధిస్తారా? అంటూ ఉపాధ్యాయ సంఘాల సమాఖ్య ప్రశ్నించింది. అంగన్వాడీలపై ఎస్మాను వెంటనే వెనక్కి తీసుకోవాలని డిమాండ్ చేసింది.

[psycopk]

Municipal Workers: మున్సిపల్ కార్మికుల మెజారిటీ డిమాండ్లకు అంగీకరించాం: మంత్రి బొత్స 

06-01-2024 Sat 21:39 | Andhra

• ఏపీలో 12 రోజులుగా సమ్మె చేస్తున్న మున్సిపల్ కార్మికులు
• ఇప్పటికే కార్మికులతో రెండు పర్యాయాలు చర్చలు జరిపిన ప్రభుత్వం
• నేడు మరోసారి సమావేశం
• మున్సిపల్ కార్మికులు వెంటనే సమ్మె విరమించాలన్న మంత్రి బొత్స
• ప్రస్తుత వేతనానికి మరో రూ.6 వేలు కలిపి ఇస్తామని వెల్లడి

 

ఏపీలో పట్టణ ప్రాంతాల పారిశుద్ధ్య కార్మికులు 12 రోజులుగా సమ్మె చేస్తున్న సంగతి తెలిసిందే. మున్సిపల్ కార్మికులతో ఇప్పటికే పలుమార్లు చర్చలు జరిపిన రాష్ట్ర ప్రభుత్వం నేడు మరోసారి వారితో సమావేశమైంది. 

ఈ సమావేశం అనంతరం మంత్రి బొత్స సత్యనారాయణ మాట్లాడుతూ, మున్సిపల్ కార్మికుల మెజారిటీ డిమాండ్లను అంగీకరించామని తెలిపారు. మున్సిపల్ కార్మికులకు వివిధ కేటగిరీల కింద జీతాలు ఉన్నాయని, ప్రస్తుతం ఇస్తున్న వేతనానికి మరో రూ.6 వేలు కలిపి ఇస్తామని బొత్స వెల్లడించారు. విధుల్లో మరణించినవారి కుటుంబాలకు రూ.7 లక్షల ఎక్స్ గ్రేషియా అందిస్తామని చెప్పారు. మున్సిపల్ కార్మికుల సమస్యల పట్ల తమ ప్రభుత్వం సానుకూలంగా ఉందని బొత్స స్పష్టం చేశారు. మున్సిపల్ కార్మికులు వెంటనే సమ్మె విరమించి విధుల్లో చేరాలని పిలుపునిచ్చారు. 

మున్సిపల్ కార్మికులు ముఖ్యంగా సమాన పనికి సమాన వేతనం డిమాండ్ తో సమ్మె చేస్తున్నారు. ఏపీ మున్సిపల్ శాఖ మంత్రి ఆదిమూలపు సురేశ్, విద్యాశాఖ మంత్రి బొత్స సత్యనారాయణ (గతంలో మున్సిపల్ శాఖ మంత్రి) ఇప్పటికే రెండు పర్యాయాలు మున్సిపల్ కార్మికులతో చర్చలు జరిపారు. అయితే ఆ చర్చలు సఫలం కాలేదు. ఈ నేపథ్యంలోనే, నేడు మరోసారి చర్చలు జరిపారు.