భూతద్దం పెట్టి వెతికినా జగన్ పాలనలో వైఎస్సార్ పాలన ఆనవాళ్లు కనిపించవు: వైఎస్‌ షర్మిల

[psycopk]

YS Sharmila: భూతద్దం పెట్టి వెతికినా జగన్ పాలనలో వైఎస్సార్ పాలన ఆనవాళ్లు కనిపించవు: వైఎస్‌ షర్మిల 

08-04-2024 Mon 16:06 | Andhra

• వైఎస్ పాలనతో జగన్ పాలనకు పోలికే లేదన్న షర్మిల
• వివేకా హత్య కేసు నిందితుడు అవినాశ్ కు మళ్లీ టికెట్ ఇచ్చారని మండిపాటు
• హంతకులకు ఓటు వేయొద్దని పిలుపు

 

తన తండ్రి వైఎస్సార్ పాలనకు, జగన్ పాలనకు మధ్య ఎలాంటి పోలిక లేదని ఏపీసీసీ అధ్యక్షురాలు షర్మిల విమర్శించారు. వైఎస్ పాలనతో జగన్ కు పోలికే లేదని... భూతద్దం పెట్టి వెతికినా కనీస ఆనవాళ్లు కూడా కనిపించవని చెప్పారు. వివేకా హత్య కేసులో ఎంపీ అవినాశ్ రెడ్డి నిందితుడని సీబీఐ చెప్పిందని... కాల్ రికార్డులు, గూగుల్ మ్యాప్స్ ఉన్నాయని తెలిపిందని గుర్తు చేశారు. అవినాశ్ హస్తం ఉందని అన్ని ఆధారాలు ఉన్నప్పటికీ... అవినాశ్ ను కాపాడుతున్నారని మండిపడ్డారు. బస్సు యాత్రలో భాగంగా కడప జిల్లా మైదుకూరు నియోజకవర్గం బ్రహ్మంగారి మఠంలో ఈరోజు ఆమె ప్రచారాన్ని నిర్వహించారు. ఈ సందర్భంగా ఆమె మాట్లాడుతూ ఈ వ్యాఖ్యలు చేశారు. 

హత్య కేసులో నిందితుడిగా ఉన్న అవినాశ్ కే మళ్లీ ఎంపీ టికెట్ ఇచ్చారని జగన్ పై షర్మిల మండిపడ్డారు. అవినాశ్ మళ్లీ చట్టసభలోకి అడుగు పెట్టకూడదని అన్నారు. హంతకులకు ఓటు వేయొద్దని చెప్పారు. వైఎస్ బిడ్డనైన తనను గెలిపించాలని... ఎవరికి ఏ కష్టం వచ్చినా అందుబాటులో ఉంటానని హామీ ఇచ్చారు. న్యాయం కోసం పోరాటం చేస్తున్న వాళ్లు ఓవైపు... హంతకులు మరోవైపు ఉన్నారని... ఎవరికి ఓటు వేసి గెలిపిస్తారో ఆలోచించాలని అన్నారు. 

రెండున్నర లక్షల ప్రభుత్వ ఉద్యోగాలు భర్తీ చేస్తామని, మెగా డీఎస్సీ ఇస్తామని జగన్ చెప్పారని... నాలుగున్నరేళ్లు నిద్రపోయి లేచిన తర్వాత 6 వేల ఉద్యోగాలకు నోటిఫికేషన్ ఇచ్చారని షర్మిల ఎద్దేవా చేశారు. సంపూర్ణ మద్య నిషేధం అని చెప్పి... ప్రభుత్వమే ఇష్టం వచ్చినట్టు మద్యం విక్రయిస్తోందని విమర్శించారు. కల్తీ మద్యం కారణంగా ఎంతో మంది ప్రాణాలు కోల్పోయారని చెప్పారు. 

[psycopk]

YS Vivekananda Reddy: వివేకా హ‌త్య కేసు.. మ‌రోసారి సుప్రీంకోర్టు మెట్లెక్కిన సునీత‌ 

08-04-2024 Mon 12:59 | Both States

• నిందితుడు శివశంక‌ర్‌రెడ్డికి తెలంగాణ హైకోర్టు బెయిల్ 
• బెయిల్‌ను ర‌ద్దు చేయాలంటూ సుప్రీంకోర్టులో సునీత పిటిష‌న్ ‌
• నేడు పిటిష‌న్‌పై జ‌స్టిస్ దీపాంక‌ర్ ద‌త్తా, జ‌స్టిస్ సంజీవ్ ఖ‌న్నా ధ‌ర్మాస‌నం విచార‌ణ

 

మాజీ మంత్రి వివేకానంద‌రెడ్డి హ‌త్య కేసులో ఆయ‌న కుమార్తె సునీత మ‌రోసారి సుప్రీంకోర్టు మెట్లెక్కారు. ఈ కేసులో నిందితుడిగా ఉన్న శివశంక‌ర్‌రెడ్డికి ఇటీవ‌ల తెలంగాణ హైకోర్టు బెయిల్ మంజూరు చేసిన విష‌యం తెలిసిందే. ఆ బెయిల్‌ను ర‌ద్దు చేయాల‌ని ఆమె తాజాగా పిటిష‌న్ వేశారు. ఆ ఆదేశాల‌ను స‌వాల్ చేస్తూ సునీత సుప్రీంకోర్టులో పిటిష‌న్ దాఖ‌లు చేశారు. ఈ పిటిష‌న్‌పై జ‌స్టిస్ దీపాంక‌ర్ ద‌త్తా, జ‌స్టిస్ సంజీవ్ ఖ‌న్నా ధ‌ర్మాస‌నం ఇవాళ విచార‌ణ చేప‌ట్ట‌నుంది.

[psycopk]

YS Sharmila: అందుకే మీ రాజన్న బిడ్డ కడప ఎంపీగా పోటీ చేస్తోంది: వైఎస్ షర్మిల 

08-04-2024 Mon 12:43 | Andhra

• ఎన్నికల ప్రచారంలో జగన్ ను, వైసీపీని టార్గెట్ చేస్తున్న షర్మిల
• రాష్ట్రంలో దౌర్జన్యాలు, అక్రమాలు పెరిగిపోయాయని విమర్శ
• ధర్మం వైపు నిలబడాలని ఓటర్లకు విన్నపం

 

ఏపీసీసీ అధ్యక్షురాలు వైఎస్ షర్మిల కడప లోక్ సభ స్థానం నుంచి పోటీ చేస్తున్నారు. ప్రస్తుతం ఆమె తన నియోజకవర్గ పరిధిలో ప్రచారాన్ని నిర్వహిస్తున్నారు. తన ఎన్నికల ప్రచారంలో ఆమె తన అన్న, సీఎం జగన్ ను నేరుగా టార్గెట్ చేస్తున్నారు. వైఎస్ వివేకా హత్య ఉదంతాన్ని ప్రధాన అస్త్రంగా వాడుతున్నారు. తాజాగా ఈరోజు ఆమె ఎక్స్ వేదికగా స్పందిస్తూ... మరోసారి వైసీపీపై విమర్శలు గుప్పించారు. వైసీపీ పాలనలో రాష్ట్రంలో ఎక్కడ చూసినా దౌర్జన్యాలు, అక్రమాలు పెరిగిపోయాయని అన్నారు. అక్రమాలను ఎదుర్కోవడానికే మీ రాజన్న బిడ్డ కడప ఎంపీగా పోటీ చేస్తోందని చెప్పారు. ధర్మం వైపు నిలబడాలని ఓటర్లను కోరారు. తనను ఆశీర్వదించాలని, గెలిపించాలని ట్వీట్ చేశారు.