తిరుమల లడ్డూ వ్యవహారంపై సమగ్ర నివేదిక ఇవ్వండి... టీటీడీ ఈవోను ఆదేశించిన సీఎం చంద్రబాబు

[psycopk]

Chandrababu: తిరుమల లడ్డూ వ్యవహారంపై సమగ్ర నివేదిక ఇవ్వండి... టీటీడీ ఈవోను ఆదేశించిన సీఎం చంద్రబాబు

20-09-2024 Fri 15:00 | Andhra

 

• తిరుమల లడ్డూ తయారీపై వివాదం
• జంతువుల కొవ్వు వాడారంటూ చంద్రబాబు ఆరోపణ
• హైకోర్టును ఆశ్రయించిన వైసీపీ
• ఈ సాయంత్రం లోగా నివేదిక ఇవ్వాలని టీటీడీ ఈవోకు సీఎం స్పష్టీకరణ

---

తిరుమల శ్రీ వెంకటేశ్వరుడి దివ్య ప్రసాదం లడ్డూ తయారీలో స్వచ్ఛమైన నెయ్యి స్థానంలో, జంతువుల కొవ్వు కలిపిన కల్తీ నెయ్యి వాడుతున్నారని సీఎం చంద్రబాబు చేసిన ఆరోపణలతో రాజకీయంగా అగ్గి రాజుకుంది. టీడీపీ, వైసీపీ నేతల మధ్య మాటల యుద్ధం మొదలైంది. కల్తీ నెయ్యి ఆరోపణలపై వైసీపీ హైకోర్టును కూడా ఆశ్రయించింది. 

ఈ క్రమంలో, సీఎం చంద్రబాబు తిరుమల లడ్డూ కల్తీ వ్యవహారంపై మంత్రులు, అధికారులతో ఈ మధ్యాహ్నం సమీక్ష నిర్వహించారు. పూర్తి వివరాలతో నివేదిక ఇవ్వాలని టీటీడీ ఈవోను ఆదేశించారు. ఈ సాయంత్రం లోపు నివేదిక ఇవ్వాలని సీఎం చంద్రబాబు స్పష్టం చేశారు. 

శ్రీవారి ఆలయ ప్రతిష్ఠకు భంగం కలిగిస్తే కఠిన చర్యలు తప్పవని స్పష్టం చేశారు. భక్తుల మనోభావాలను దెబ్బతీసే చర్యలను ఎట్టి పరిస్థితుల్లో సహించబోమని అన్నారు.

[psycopk]

Tirumala Laddu Issue: ఇది స‌నాత‌న ధ‌ర్మంపై జ‌రిగిన దాడి: రామ‌జ‌న్మ భూమి ప్ర‌ధాన అర్చ‌కుడు స‌త్యేంద్ర దాస్

20-09-2024 Fri 14:47 | National

 

• తిరుమ‌ల ల‌డ్డూ వివాదంపై స్పందించిన‌ రామ‌జ‌న్మ భూమి ప్ర‌ధాన అర్చ‌కుడు
• ఇది క‌చ్చితంగా కుట్రేన‌న్న ఆచార్య‌ స‌త్యేంద్ర దాస్
• ఈ విష‌యాన్ని ప్ర‌భుత్వం చాలా సీరియ‌స్‌గా తీసుకోవాలని సూచ‌న‌
• దోషులను క‌ఠినంగా శిక్షించాల‌ని వ్యాఖ్య

---

తిరుమ‌ల ల‌డ్డూ ప్ర‌సాదంపై నెలకొన్న వివాదంపై అయోధ్య రామ‌జ‌న్మ భూమి మందిరం ప్ర‌ధాన అర్చ‌కుడు ఆచార్య‌ స‌త్యేంద్ర దాస్ స్పందించారు. ఇది స‌నాత‌న‌ ధ‌ర్మంపై జ‌రిగిన దాడిగా ఆయ‌న అభివ‌ర్ణించారు. ల‌డ్డూ ప్ర‌సాదంలో క‌ల్తీ అనేది తీవ్ర‌మైన విష‌యమ‌ని ఆయ‌న‌ పేర్కొన్నారు. 

ఆచార్య‌ స‌త్యేంద్ర దాస్ మాట్లాడుతూ... "ప‌విత్ర‌మైన‌ దైవ ప్ర‌సాదంలో చేప‌నూనె క‌లిపిన‌ట్లు త‌నిఖీల్లో స్ప‌ష్ట‌మైంది. ఇదంతా ఎప్పుడు జ‌రిగిందో ఇప్ప‌టికీ తెలియ‌ట్లేదు. ఇది క‌చ్చితంగా కుట్ర‌. స‌నాత‌న ధ‌ర్మంపై జ‌రిగిన దాడి అని చెప్ప‌డంలో ఎలాంటి సందేహం లేదు. ఈ దాడిని ప్ర‌భుత్వం చాలా సీరియ‌స్‌గా తీసుకోవాలి. స‌మ‌గ్ర విచార‌ణ జ‌రిపి దోషులను క‌ఠినంగా శిక్షించాలి" అని ఆయ‌న అన్నారు. 

[psycopk]

YS Jagan: తిరుమల లడ్డూ వ్యవహారంపై మాజీ సీఎం జగన్ స్పందన

20-09-2024 Fri 16:04 | Both States

 

• నెయ్యిలో జంతువుల కొవ్వు అనేది కట్టుకథ అని ఖండించిన వైసీపీ అధినేత
• దశాబ్దాలుగా జరుగుతున్న పద్దతుల్లోనే తిరుమలలో లడ్డూ తయారీ జరుగుతోందని వ్యాఖ్య
• ఒక ముఖ్యమంత్రి ఇలా అబద్ధాలు ఆడటం ధర్మామేనా అని విమర్శలు

---

దేశవ్యాప్తంగా చర్చనీయాంశమైన తిరుమల లడ్డూ వ్యవహారంపై ఏపీ మాజీ ముఖ్యమంత్రి, వైసీపీ అధినేత వైఎస్ జగన్ మోహన్ రెడ్డి స్పందించారు. లడ్డూ తయారీలో వాడే నెయ్యిలో జంతువుల కొవ్వు ఉందనేది ఒక కట్టు కథ అని కొట్టిపారేశారు. దశాబ్దాలుగా జరుగుతున్న పద్దతుల్లోనే తిరుమలలో లడ్డూ తయారీ జరుగుతోందని అన్నారు. 

దేవుడిని కూడా రాజకీయాలకు వాడుకునే దుర్మార్గమైన మనస్తత్వం చంద్రబాబుది అని విమర్శించారు. భక్తుల మనోభావాలతో ఆడుకోవడం ధర్మమేనా? అని ఆయన ప్రశ్నించారు.

ప్రతి 6 నెలలకు ఒకసారి నెయ్యి సరఫరా కోసం టెండర్లు పిలుస్తారని, చంద్రబాబు ముఖ్యమంత్రిగా ఉన్న సమయంలోనే నెయ్యి శాంపిల్స్ తీసుకున్నారని, జులై 23న రిపోర్ట్ వస్తే ఇప్పుడు చంద్రబాబు మాట్లాడడం విడ్డూరం అని మండిపడ్డారు.

ఎప్పటిలాగా ఒకే విధానంలో లడ్డూ తయారీ సామగ్రి కొనుగోలు ప్రక్రియ జరుగుతోందని చెప్పారు. నెయ్యి నాణ్యత నిర్ధారణ పరీక్ష విధానాలను ఎవరూ మార్చలేదని, ఇంత దుర్మార్గమైన పని ఎవరైనా చేయగలరా అని అన్నారు. ఒక సీఎం ఇలా అబద్ధాలు ఆడటం ధర్మామేనా అని జగన్ మండిపడ్డారు. 

జులై 17న ఎన్‌డీడీబీకి నెయ్యి శాంపిల్స్ పంపించారని, జులై 23న రిజెక్ట్ చేస్తే చంద్రబాబు ఇప్పటివరకు ఏం చేశారు?. ఎందుకు బయటకు చెప్పలేదని ప్రశ్నించారు. జరగనిది జరిగినట్టు చంద్రబాబు చెబుతున్నారని జగన్ పేర్కొన్నారు. నెయ్యి తీసుకొచ్చే ప్రతి ట్యాంకర్ సర్టిఫికెట్ తీసుకోవాలని, ప్రతి ట్యాంక్ శాంపిళ్లను మూడుసార్లు టెస్ట్ చేస్తారని వివరించారు.

అబద్ధాలను ప్రచారం చేయడం ద్వారా తిరుమల పవిత్రతను దెబ్బతీస్తున్నారని వైఎస్ జగన్ అన్నారు. మన తిరుమలను మనమే తక్కువ చేసుకుంటున్నామని అన్నారు. లడ్డూ వ్యవహారంపై ప్రధాని నరేంద్ర మోదీకి, సుప్రీంకోర్ట్ ప్రధాన న్యాయమూర్తికి లేఖ రాస్తానని అన్నారు. 100 రోజుల పాలనపై ప్రజల దృష్టి మళ్లించడానికే ఈ వ్యవహారం అని అన్నారు.

కూటమి ప్రభుత్వ 100 రోజుల పాలనపై మండిపాటు

మరోవైపు సీఎం చంద్రబాబు సారథ్యంలోని కూటమి ప్రభుత్వ 100 రోజుల పాలనపై జగన్ విమర్శలు గుప్పించారు. చంద్రబాబు వంద రోజుల పాలన అంతా మోసమేనని వ్యాఖ్యానించారు. 

"సూపర్ సిక్స్ లేదు... సెవెనూ లేదు. వ్యవస్థలన్నీ తిరోగమనంలో ఉన్నాయి. గోరు ముద్ద గాలికి ఎగిరిపోయింది. ఆరోగ్యశ్రీ బిల్లులు పెండింగ్‌లో ఉన్నాయి. ఇప్పటివరకు వసతి దీవెన, విద్యా దీవెన కూడా ఇవ్వలేదు. 108, 104 ఉద్యోగులకు ఇప్పటివరకు జీతాలు ఇవ్వలేదు. డైవర్షన్ పాలిటిక్స్‌లో చంద్రబాబు దిట్ట. వరదలు వస్తాయని అప్రమత్తత ఉన్నా రివ్యూ చేయలేదు’’ అని జగన్ ఆరోపించారు.

[psycopk]

Tirumala: శ్రీవారి లడ్డూ ప్రసాదం వివాదం... చంద్రబాబుకు బండి సంజయ్ లేఖ

20-09-2024 Fri 16:54 | Both States

 

• ప్రసాదంలో జంతువుల కొవ్వు వినియోగం ఆందోళన కలిగిస్తోందన్న సంజయ్
• హిందూ సమాజం మనోభావాలను తీవ్రంగా కలచివేస్తోందన్న బండి సంజయ్
• లడ్డూ వ్యవహారంలో తిరుమల పవిత్రతను దెబ్బతీశారని ఆందోళన

---

తిరుమల శ్రీవారి లడ్డూ ప్రసాదం విషయమై ఏపీ సీఎం చంద్రబాబుకు కేంద్ర సహాయ మంత్రి బండి సంజయ్ బహిరంగ లేఖ రాశారు. లడ్డూ ప్రసాదంలో జంతువుల కొవ్వు వినియోగం తీవ్ర ఆందోళన కలిగిస్తోందని, ఇది క్షమించరాని నేరం అన్నారు. ఈ అంశంపై సీబీఐ విచారణ కోరాలన్నారు. ఈ లడ్డూ ప్రసాదం వ్యవహారం శ్రీవారి భక్తకోటిని, యావత్ హిందూ సమాజం మనోభావాలను తీవ్రంగా కలచివేస్తోందన్నారు.

లడ్డూ వ్యవహారంలో తిరుమల పవిత్రతను దెబ్బతీశారని ఆందోళన వ్యక్తం చేశారు. అన్యమత ప్రచారం జరుగుతోందని గతంలో ఫిర్యాదులు వచ్చినప్పటికీ నాటి పాలకులు పట్టించుకోలేదన్నారు. ఎర్రచందనం కొల్లగొడుతూ ఏడు కొండలవాడిని రెండు కొండలకే పరిమితం చేశారని చెప్పినా స్పందించలేదన్నారు. జంతువుల కొవ్వును లడ్డూ ప్రసాదంలో వినియోగించారని మీరు చేసిన వ్యాఖ్యలతో... కల్తీ జరిగినట్లుగా హిందూ సమాజం భావిస్తోందన్నారు.

లడ్డూ ప్రసాదంలో జంతువుల కొవ్వును వినియోగించడం అత్యంత నీచమని, దీనిని హిందూ ధర్మంపై జరిగిన భారీ కుట్రగా భావిస్తున్నామని పేర్కొన్నారు. లడ్డూ ప్రాముఖ్యతను తగ్గించడం ద్వారా టీటీడీపై కోట్లాది మంది భక్తుల విశ్వాసాన్ని సడలించేందుకు కుట్ర చేశారన్నారు. ఇది క్షమించరాని నేరం అన్నారు. అన్యమతస్తులకు టీటీడీ బాధ్యతలు అప్పగించడం, ఉద్యోగాల్లో అవకాశం కల్పించడం వల్లే ఈ దుస్థితి వచ్చిందన్నారు.

ఉన్నతస్థాయి వ్యక్తుల ప్రమేయం లేకుండా ఏళ్లుగా కల్తీ దందా జరిగే అవకాశం ఉండదన్నారు. సీబీఐతో విచారణ జరిపిస్తే నిజాలు నిగ్గు తేలుస్తాయని, అయితే అంతిమ నిర్ణయం రాష్ట్ర ప్రభుత్వానిదే అన్నారు. రాజకీయ ప్రయోజనాలను పక్కన పెట్టి హిందువుల మనోభావాలను కాపాడాల్సిన బాధ్యత రాష్ట్ర ప్రభుత్వంపై ఉందన్నారు. సమగ్ర విచారణ జరిపి దోషులపై చర్యలు తీసుకోవాలని కోరారు.

[psycopk]

Bhumana Karunakar Reddy: చంద్రబాబుది తప్పుడు ప్రచారం.. హిందువులకు వెంటనే క్షమాపణ చెప్పాలి: భూమన కరుణాకర్ రెడ్డి

20-09-2024 Fri 11:31 | Andhra

 

• తిరుమల లడ్డూలో జంతువుల కొవ్వు వాడారన్న చంద్రబాబు
• స్వామి లడ్డూతో చంద్రబాబు రాజకీయాలు చేస్తున్నారన్న భూమన
• తాము ఎలాంటి విచారణకైనా సిద్ధమేనని వ్యాఖ్య

---

భక్తులు ఎంతో పవిత్రంగా భావించే తిరుమల లడ్డూ తయారీలో ఫిష్ ఆయిల్, పంది కొవ్వు, బీఫ్ కొవ్వు వాడారనే విషయం కలకలం రేపుతోంది. వైసీపీ ప్రభుత్వ హయాంలో ఈ దారుణాలు జరిగాయని అధికార పక్షం ఆరోపిస్తోంది. గుజరాత్ లోని ల్యాబ్ లో జరిపించిన టెస్టులో ఈ విషయం బయటపడిందని సీఎం చంద్రబాబు తెలిపారు. ఈ దారుణానికి ఒడిగట్టిన వారిపై కఠిన చర్యలు తీసుకుంటామని డిప్యూటీ సీఎం పవన్ ప్రకటించారు. 

ఈ నేపథ్యంలో వైసీపీ నేత, టీటీడీ మాజీ ఛైర్మన్ భూమన కరుణాకర్ రెడ్డి మాట్లాడుతూ చంద్రబాబుపై మండిపడ్డారు. స్వామివారి లడ్డూను వాడుకుని చంద్రబాబు రాజకీయాలు చేయాలనుకున్నారని... అయితే ఆయన ప్రయత్నం బెడిసికొట్టిందని చెప్పారు. తమపై వేసిన అపవాదుకు ఎలాంటి విచారణకైనా సిద్ధమేనని అన్నారు. వైసీపీని దెబ్బతీయాలనే ఉద్దేశంతో చంద్రబాబు తప్పుడు ప్రచారం చేస్తున్నారని మండిపడ్డారు. నేషనల్ డెయిరీ డెవలప్ మెంట్ బోర్డు ఫేక్ రిపోర్టుతో జాతీయ మీడియా ద్వారా తప్పుడు ప్రచారం చేస్తున్నారని దుయ్యబట్టారు. హిందువులను చంద్రబాబు అవమానించారని... ఆయన వెంటనే హిందూ సమాజానికి క్షమాపణ చెప్పాలని డిమాండ్ చేశారు.

[psycopk]

Pawan Kalyan: బాధ్యుల‌పై క‌ఠిన చ‌ర్య‌లు.. తిరుమ‌ల ల‌డ్దూ వివాదంపై డిప్యూటీ సీఎం ప‌వ‌న్ క‌ల్యాణ్‌

20-09-2024 Fri 10:21 | Both States

 

• తిరుమ‌ల ల‌డ్డూ ప్ర‌సాదంలో జంతువుల కొవ్వు క‌ల‌ప‌డం బాధాక‌ర‌మ‌న్న ప‌వ‌న్‌
• ఇది అంద‌రి మ‌నోభావాల‌నూ దెబ్బ‌తీసింద‌ని వ్యాఖ్య‌
• దేశంలోని దేవాల‌యాల స‌మ‌స్య‌ల‌ ప‌రిశీలన‌కు 'సనాతన ధర్మ రక్షణ బోర్డు' ఏర్పాటుకు డిమాండ్‌
• సనాతన ధర్మాన్ని అప‌విత్రం చేయ‌కుండా ఉండేలా అంద‌రూ క‌లిసిరావాల‌న్న‌ ప‌వ‌న్

---

తిరుమ‌ల శ్రీవారి ల‌డ్డూ ప్ర‌సాదం వివాదంపై డిప్యూటీ సీఎం ప‌వ‌న్ క‌ల్యాణ్ స్పందించారు. బాధ్యుల‌పై క‌ఠిన చ‌ర్య‌లు తీసుకుంటామ‌ని తెలిపారు. 'ఎక్స్' (ట్విట్ట‌ర్‌) వేదిక‌గా ఓ సంస్థ ఫిర్యాదు చేస్తూ పెట్టిన పోస్టుకు ఆయ‌న రిప్లై ఇవ్వ‌డం జ‌రిగింది.

ఈ అంశంపై తీవ్ర విచారం వ్య‌క్తం చేస్తున్న‌ట్లు పేర్కొన్న ప‌వ‌న్‌.. వైసీపీ హ‌యాంలో ప‌నిచేసిన టీటీడీ బోర్డు ఎన్నో ప్ర‌శ్న‌ల‌కు స‌మాధానం చెప్పాలని అన్నారు. తిరుమ‌ల ల‌డ్డూ ప్ర‌సాదంలో జంతువుల కొవ్వు క‌ల‌ప‌డం బాధాక‌ర‌మ‌ని అన్నారు. ఇది అంద‌రి మ‌నోభావాల‌నూ దెబ్బ‌తీసింద‌న్నారు. బాధ్యుల‌పై సాధ్యమైనంత కఠిన చర్యలు తీసుకోవడానికి తమ ప్రభుత్వం కట్టుబడి ఉందని ప‌వ‌న్ తెలిపారు.

అలాగే దేశంలోని దేవాల‌యాలకు సంబంధించిన అన్ని స‌మ‌స్య‌ల‌ను ప‌రిశీలించేలా జాతీయ స్థాయిలో 'సనాతన ధర్మ రక్షణ బోర్డు'ని ఏర్పాటు చేయాల్సిన సమయం ఆసన్నమైందన్నారు. జాతీయ స్థాయిలో విధాన నిర్ణేతలు, మత పెద్దలు, న్యాయవ్యవస్థ, పౌరులు, మీడియా, వారి సంబంధిత డొమైన్‌లందరిచే ఈ విష‌యంపై చర్చ జరగాలి. సనాతన ధర్మాన్ని ఏ రూపంలోనైనా అప‌విత్రం చేయ‌కుండా ఉండేలా అంద‌రూ క‌లిసిరావాలి అని ప‌వ‌న్ క‌ల్యాణ్ పిలుపునిచ్చారు.

[psycopk]

Tirumala Laddu: మా స్వామి మీకేం పాపం చేశాడ్రా దరిద్రుల్లారా!: ఆనం వెంకటరమణారెడ్డి ఫైర్

19-09-2024 Thu 20:55 | Andhra

 

• తిరుమల లడ్డూలో జంతువుల కొవ్వు
• చంద్రబాబు సంచలన ఆరోపణలు
• గుజరాత్ ల్యాబ్ లో స్పష్టమైందన్న ఆనం వెంకటరమణారెడ్డి

---

గత ప్రభుత్వ హయాంలో తిరుమల శ్రీవారి లడ్డూ ప్రసాదంలో నాణ్యమైన నెయ్యికి బదులు జంతువుల కొవ్వు వాడారంటూ సీఎం చంద్రబాబు సంచలన ఆరోపణలు చేసిన సంగతి తెలిసిందే. చంద్రబాబు వ్యాఖ్యలు తీవ్ర రాజకీయ దుమారం రేపాయి. చంద్రబాబు వ్యాఖ్యలపై వైసీపీ నేతలు సవాళ్లు విసురుతున్నారు. 

ఈ నేపథ్యంలో, టీడీపీ అధికార ప్రతినిధి ఆనం వెంకటరమణారెడ్డి మీడియా సమావేశం నిర్వహించి వైసీపీ నేతలపై నిప్పులు చెరిగారు. కొవ్వును కరిగించి తీసిన నూనెను స్వామివారి లడ్డూల్లో వాడతారేంట్రా దరిద్రుల్లారా...  మా స్వామి మీకేం పాపం చేశాడ్రా! అంటూ మండిపడ్డారు.

గుజరాత్ లోని నేషనల్ డెయిరీ డెవలప్ మెంట్ బోర్డు ల్యాబ్ లో శాంపిల్స్ పరీక్షించగా, సంచలన విషయాలు వెల్లడయ్యాయని తెలిపారు. తిరుమల లడ్డూ తయారీలో గొడ్డు మాంసం కొవ్వు, ఫిష్ ఆయిల్, కుళ్లిన జంతుమాంసం కొవ్వు వాడారని ఆరోపించారు. అవి ఏ జంతువులైనా కావొచ్చని, కుక్కలు, పిల్లుల మాంసం కావొచ్చని వ్యాఖ్యానించారు. 

ఇదంతా తాడేపల్లి ప్యాలెస్ వైఎస్ ల్యాబ్ లో కాదని, గుజరాత్ లోని ల్యాబ్ లో పరీక్షించారని అన్నారు. గుజరాత్ లోని నేషనల్ డెయిరీ డెవలప్ మెంట్ బోర్డు ల్యాబ్ భారత్ లోనే కాదు, ప్రపంచంలోనే అత్యుత్తమ ల్యాబ్ లలో ఒకటి అని ఆనం వెంకటరమణారెడ్డి వివరించారు. చెన్నై నుంచి నెల్లూరుకు కుక్కల మాంసం వస్తుంటుందని, ఎన్నోసార్లు కుక్క మాంసం పట్టుబడిందని వెల్లడించారు. ఇప్పుడు కుక్క మాంసం కొవ్వును కూడా వెంకటేశ్వరస్వామి లడ్డూ తయారీలో వాడారని భయం కలుగుతోందని చెప్పారు. 

ఏందిరా ఇదంతా... తిరుమల వెంకన్నస్వామి లడ్డూలో గొడ్డు మాంసం కొవ్వు కలుపుతారా? కుళ్లిపోయిన జంతువుల కొవ్వు నుంచి తీసిన నూనెను స్వామివారి లడ్డూల్లో వాడతారా? ఎంతటి అపచారం! 

జగన్ మోహన్ రెడ్డి, ఆయన బంధువులు దేవుడ్ని నమ్మరు... మేం ఈ విషయాన్ని పదేపదే చెబుతున్నాం. వాళ్లకు వెంకటేశ్వరస్వామిపై నమ్మకం లేదన్న విషయం ఇవాళ రుజువైంది... ఇవాళ ప్రతి హిందువు స్నానం చేసి ఇంట్లో పసుపు నీళ్లు చల్లుకుని, దీపం వెలిగించి స్వామివారిని క్షమాపణ కోరండి... తప్పు ఎవరు చేసినా హిందువులమైన మనందరం భరించాలి.. ఈ పాపం మనకు తగలకుండా చూసుకుందాం" అని ఆనం వెంకటరమణారెడ్డి పిలుపునిచ్చారు.