పెద్దనోట్ల రద్దు చర్య సృజనాత్మక విధ్వంసం ఆర్బీఐ మాజీ గవర్నర్ దువ్వూరి సుబ్బారావు

[JANASENA]

హైదరాబాద్‌: పెద్ద నోట్ల రద్దు చర్యకు భారతీయ రిజర్వ్‌ బ్యాంకు(ఆర్‌బీఐ) మాజీ గవర్నర్‌ దువ్వూరి సుబ్బారావు మరోసారి మద్దతు పలికారు. 1991 ఆర్థిక సంస్కరణల తర్వాత ప్రభుత్వం తీసుకున్న సృజనాత్మక విధ్వంసక చర్యగా ఆయన అభివర్ణించారు. నల్లధనం నిర్మూలనకు ఇది ఎంతగానో ఉపయోగపడుతుందని పేర్కొన్నారు. హైదరాబాద్‌లో జరిగిన ఓ అంతర్జాతీయ సదస్సులో ఆయన పాల్గొని ప్రసంగించారు.

‘చెలామణిలో ఉన్న 86శాతం కరెన్సీని రద్దు చేస్తూ నవంబర్‌ 8న ప్రధానమంత్రి నరేంద్రమోదీ కీలక నిర్ణయం తీసుకున్నారు. 1991 ఆర్థిక సంస్కరణల తర్వాత ఇది నిస్సందేహంగా దేశంలో జరిగిన సృజనాత్మక విధ్వంస చర్య. అంతేకాకుండా ఇది ప్రత్యేకమైనది కూడా. దీనిని ప్రత్యేక సృజనాత్మక విధ్వంస చర్యగా ఎందుకు అభివర్ణిస్తున్నానంటే నల్లధనాన్ని చాలా తెలివిగా నాశనం చేయడం’ అని ఆయన అన్నారు.

పెద్ద నోట్ల రద్దు చర్య ద్వారా సరికొత్త ఆవిష్కరణలకు మార్గం సుగమం అవుతుందని, ముఖ్యంగా ఆర్థిక రంగం డిజిటల్‌ చెల్లింపుల వైపు పయనిస్తుందని తెలిపారు. ఖర్చు, ప్రయోజనాల పరంగా ఈ చర్యను చూస్తే తీవ్ర వివాదాస్పద చర్చకు దారితీస్తుందని, అయితే ఈ విధాన ఆవిష్కరణలో ఎలాంటి వివాదానికి తావులేదని అన్నారు. సంప్రదాయ బ్యాంకింగ్‌ వ్యవస్థలో తక్కువ రేటుకు డిపాజిట్లు చేయడం జరుగుతోందని, ఇది ఆర్థిక సంస్థలకు, ఫైనాన్షియల్‌ టెక్నాలజీ కంపెనీలకు లాభం చేకూర్చేలా ఉందని సుబ్బారావు తెలిపారు. అయితే ఆ కంపెనీల వ్యాపార నమూనాల వల్ల ఆ లాభం స్థిరీకరించబడుతోందని, సమర్థత, సేవ, నమ్మకాన్ని పక్కకు నెట్టేస్తోందని అన్నారు. మైక్రోఫైనాన్స్‌ల వల్ల లక్షలాది కుటుంబాలు లబ్ధి పొందాయని, ముఖ్యంగా ఆంధ్రప్రదేశ్‌ విభజనకు ముందు ఇది చోటు చేసుకుందని సుబ్బారావు పేర్కొన్నారు.