TDP - PPT - E-lavadevis lo mundunna AP spastam chesina E-Taal

[ARYA]

 

ఈ-పరుగులో తెలుగు రాష్ట్రాలు ఆదర్శప్రాయంగా నిలుస్తున్నాయి. కేంద్రం నిర్వహిస్తున్న ‘ఎలక్ట్రానిక్‌ లావాదేవీల గణాంక, విశ్లేషణ సంస్థ’ (ఈ-తాల్‌) పరిశీలనలో ఇది స్పష్టమైంది. ఈ ఏడాది జనవరి నుంచి ఇప్పటివరకు దేశవ్యాప్తంగా నిర్వహించిన ‘ఈ-లావాదేవీల’ సంఖ్య 1073.40 కోట్లు. ‘ఈ-పాలన’ సంస్కరణలను అందిపుచ్చుకుని ప్రజలకు మెరుగైన సేవలు అందించడంలో ఆంధ్రప్రదేశ్ ముందుంది. 

ఈ-పాలన ద్వారా కేంద్ర, రాష్ట్ర ప్రభుత్వాలు అందిస్తున్న సేవలను ప్రజలు ఎలా ఉపయోగించుకుంటున్నారు? ఎలక్ట్రానిక్‌ లావాదేవీల సరళి ఎలా ఉందనే అంశాలను ‘ఈ-తాల్‌’ సంస్థ నిత్యం మదింపు చేస్తుంది. కేంద్రం అమలుచేస్తున్న 31 మిషన్‌ మోడ్‌ పథకాలు(ఎంఎంపీ), 21 మంత్రిత్వ శాఖలు అందించే 2267 ఈ-సేవలు, అన్ని రాష్ట్ర ప్రభుత్వాలు, కేంద్ర పాలిత ప్రాంతాలు అందిస్తున్న ఈ-సేవలను ఈ సంస్థ పరిశీలిస్తోంది. వీటన్నింటినీ తన కోర్‌ డ్యాష్‌బోర్డుకు అనుసంధానిస్తూ పర్యవేక్షిస్తుంది. ఇందులో తేలిన అంశాల ప్రకారం రోజుకు సగటున దేశవ్యాప్తంగా 4.65 కోట్ల 
ఈ-లావాదేవీలను నిర్వహిస్తున్నారు.

ఈ-పాలన ద్వారా ఆంధ్రప్రదేశ్‌ 204 రకాల సేవలను కల్పిస్తోంది. జనన మరణ ధ్రువీకరణ, పన్నుల చెల్లింపు, డ్రైవింగ్‌ లైసెన్సులు, రిజిస్ట్రేషన్లు, ఇలా పలు రకాల ఈ-సేవలను... వివిధ శాఖలు వివిధ రకాల ఈగవర్నెన్స్‌ సేవలను అందిస్తోంది. ఈ ఏడాది ఇప్పటివరకు దేశంలోనే ఎక్కువగా గుజరాత్ లో 38.87 కోట్లు, ఏపీలో 32.55 కోట్లు, తెలంగాణలో 29.02 కోట్ల ఈ -లావాదేవీలు నమోదయ్యాయి. గుజరాత్‌ ప్రభుత్వం 146 రకాల సేవలే కల్పిస్తున్నప్పటికీ అక్కడ ఈ- లావాదేవీలు నిర్వహిస్తున్న వారు ఎక్కువగా ఉన్నారు. వేయి మంది జనాభాకు ఏపీలో ఈ ఏడాదికి సగటున 6,564 లావాదేవీలు జరిగాయి.

దేశంలో ఈ ఏడాది ప్రభుత్వ ఈ-గవర్నెన్స్‌ సేవల సైట్ల ద్వారా 4.02 కోట్ల బ్యాంకింగ్‌ లావాదేవీలు జరుగగా ఆంధ్రప్రదేశ్‌లో 8.49 లక్షల లావాదేవీలు, తెలంగాణలో 2.03లక్షల లావాదేవీలు జరిగాయి. మధ్యప్రదేశ్‌ లో మాత్రం ఎక్కువగా 2.80 కోట్ల లావాదేవీలను నిర్వహించారు.