CBN South Korea Tour

[SonyKongara]

రాష్ట్రంలో కొరియా పారిశ్రామిక మండలి
ఫోన్‌ చేస్తే చాలు పలుకుతా
ఈనాడు - అమరావతి

ఆన్‌ యోంగ్‌ హో సే (కొరియాలో అందరికీ నమస్కారం). ఇప్పటికింతే కొరియన్‌ భాష తెలుసు. మళ్లీ వచ్చినప్పుడు ఇంతకంటే మెరుగ్గా మాట్లాడతాను. మా సమర్థత ఏంటో తెలుసుకోవాలంటే కియా ప్రతినిధులను అడగండి. పౌరులు నేరుగా ప్రభుత్వంతో మాట్లాడే వ్యవస్థ ఏర్పాటు చేశాం. అవినీతికి తావు లేదు. మీకు ఒక్క ఫోన్‌ కాల్‌,  మెసేజ్‌ దూరంలోనే అందుబాటులో ఉంటా. ఆంధ్రాకు దక్షిణకొరియా నమ్మకమైన వ్యాపార భాగస్వామి అవుతుందని భావిస్తున్నా. ప్రతి ఒక్కరూ ఒక్కో ప్రాజెక్టుతో మా రాష్ట్రానికి వచ్చి పెట్టుబడులు పెట్టండి. ఏపీలో వ్యాపారం చేయడం ఎంత సులభతరమో ప్రత్యక్షంగా మీరే చూడండి.

- ముఖ్యమంత్రి చంద్రబాబునాయుడు

రాష్ట్రంలో కొరియా పారిశ్రామికమండలి (ఇండస్ట్రియల్‌ కాంప్లెక్స్‌) ఏర్పాటు కానుంది. ఈ మేరకు ‘మేకిన్‌ ఇండియా కొరియా సెంటర్‌’ (ఎంఐసీ), ఏపీకి మధ్య కీలకమైన అవగాహన ఒప్పందం కుదిరింది. పారిశ్రామిక మహానగరం బుసాన్‌లో ఏపీ ఒక కేంద్రాన్ని ఏర్పాటు చేయనుంది. రాష్ట్రంలో పెట్టుబడులు ఆకర్షించడంలో భాగంగా ఆంధ్రప్రదేశ్‌ రాష్ట్ర ప్రభుత్వం రెండోరోజు మంగళవారం ఇక్కడ రోడ్‌ షో నిర్వహించింది. ఈ సందర్భంగా జరిగిన సదస్సులో  ‘శుభోదయం... అందరికీ నమస్కారం’... అంటూ ముఖ్యమంత్రి చంద్రబాబునాయుడు కొరియన్‌ భాషలో పలకరించడంతో పారిశ్రామికవేత్తలు, ప్రజాప్రతినిధులు పులకించారు. పెట్టుబడిదారులతో ముఖాముఖి సమావేశమయ్యారు. ఈ నగర మేయర్‌ సుహ్‌ బ్యూంగ్‌ సూతో భేటీ అయ్యారు. తాను గతంలో చెన్నై, ముంబయి నగరాలకు వచ్చానని, ఆంధ్రాకు రాలేదని, చంద్రబాబు నాయకత్వం గురించి తనకు తెలుసని మేయర్‌ పేర్కొన్నారు. ఏపీ, బుసాన్‌ల మధ్య కొత్త స్నేహం ఉభయతారకంగా ఉండగలదన్న ఆశాభావాన్ని వెలిబుచ్చారు. కొరియా మత్స్యవిశ్వవిద్యాలయం, ఏపీలు పరస్పర సహకారం అందించుకునే అవకాశాలపై వైస్‌ మేయర్‌ కిమ్‌ యంగ్‌వాన్‌తో చంద్రబాబు చర్చించారు. ఏపీతో కలిసి పనిచేసేలా తమ జాతీయవర్సిటీతో సంప్రదింపులు జరుపుతామని కిమ్‌ హామీ ఇచ్చారు. ‘‘పరిశ్రమలు నెలకొల్పడానికి వచ్చే వారికి 21 రోజుల్లో అన్ని అనుమతులు ఏకగవాక్ష విధానంలో ఇస్తున్నాం. 24 గంటలు విద్యుత్తు సరఫరా చేస్తున్నాం. ఈ రంగంలో ఏ అవార్డు ఉన్నా అది ఏపీకే వస్తోంది. ప్రశాంత వాతావరణం ఉంది. కార్మికుల సమ్మెలు ఉండవు. పారదర్శకపాలన అందిస్తున్నాం. ఇక్కడున్న ప్రతి పారిశ్రామికవేత్త ఒక్కో ప్రాజెక్టుతో మా రాష్ట్రానికి వచ్చి పెట్టుబడులు పెట్టండి. మీకు కావాల్సిన సంపూర్ణ సహకారం అందిస్తాం...’’ అని సీఎం చంద్రబాబు పేర్కొన్నారు.

కొరియా భాషలో దృశ్యరూప ప్రదర్శన
బుసాన్‌లో ఆంధ్రప్రదేశ్‌ ముఖ్యమంత్రి చంద్రబాబు, అధికారుల బృందం దృశ్యరూప ప్రదర్శనలన్నీ కొరియన్‌ భాషలో ఇవ్వడం అక్కడ పారిశ్రామికవేత్తలను అమితంగా ఆకట్టుకుంది. సీఎం సియోల్‌ నుంచి ఇక్కడకు స్పీడు ట్రైన్‌లో వచ్చారు. వైస్‌ మేయర్‌ కిమ్‌ యంగ్‌వాన్‌ ఘనస్వాగతం పలుకుతూ... ‘మీరు డైనమిక్‌ లీడర్‌, కొరియా, ఏపీ మధ్య అనేక సారూప్యతలున్నాయి, పలు రంగాల్లో పరస్పర సహకారం అందించుకుందాం..’ అని పేర్కొన్నారు. దక్షిణకొరియాలో భారత రాయబారి దొరైస్వామి మాట్లాడుతూ భారత్‌లో కొరియా సంస్థలు వ్యాపారం చేయాలనుకుంటే ఆంధ్రప్రదేశ్‌ను మించిన ప్రాంతం మరొకటి లేదన్నారు. ఓడరేవును సీఎం, రాష్ట్ర ప్రతినిధుల బృందం సందర్శించింది. పోర్టు అథారిటీ ఉపాధ్యక్షులు కాంగ్‌ బూ వో దీని ప్రత్యేకతలను వివరించారు. తమ రాష్ట్రంలో 14 ఓడరేవులను అభివృది ్ధచేస్తున్నామని, సహకారం అందించాలని సీఎం కోరారు. ఈ పర్యటనలో రాష్ట్ర మంత్రులు, ఇతర అధికారుల బృందం ప్రతినిధులు పాల్గొన్నారు.

[SonyKongara]

[SonyKongara]