భారత్ పై మరోసారి దాడిచేస్తే వినాశనం తప్పదు!: పాకిస్థాన్ కు అమెరికా సీరియస్ వార్నింగ్

[vatsayana]

https://www.ap7am.com/flash-news-643315-telugu.html

• ఉగ్రవాదులపై దృఢవైఖరి చూపాల్సిందే
• మరో ఉగ్రదాడి జరిగితే పాక్ కు కష్టాలే
• ఉద్రిక్తతల్ని ఎవరూ చల్లార్చలేరు

పుల్వామా దాడి ఘటన జరిగినప్పటినుంచి పాకిస్థాన్ పై అగ్రరాజ్యం అమెరికా వైఖరిలో మార్పు కనిపిస్తోంది. ఉగ్రవాద వ్యతిరేక కార్యకలాపాల కోసం తాము అందించిన ఎఫ్-16 యుద్ధ విమానాలను భారత పై దాడులకు పాక్ ఉపయోగించడాన్ని అమెరికా తీవ్రంగా గర్హిస్తోంది. అంతేకాకుండా, పాక్ గడ్డపై నుంచే పుల్వామా దాడికి ప్రణాళిక జరిగిందని నమ్ముతున్న యూఎస్, జైషే మహ్మద్ నేత మసూద్ అజహర్ కు పాక్ ఆవాసం ఇవ్వడంపైనా అసంతృప్తితో ఉన్నట్టు తెలుస్తోంది. ఈ నేపథ్యంలో, అమెరికా నుంచి వెలువడిన విస్పష్టమైన ప్రకటన నిస్సందేహంగా పాకిస్థాన్ కు గట్టి హెచ్చరిక అని చెప్పాలి. భారత్ పై మరొక్క ఉగ్రదాడి జరిగినా పాకిస్థాన్ కు జరిగే నష్టం తీవ్రస్థాయిలో ఉంటుందని అమెరికా అధ్యక్ష కార్యాలయం స్పష్టం చేసింది. 

"జైషే మహ్మద్, లష్కరే తోయిబా వంటి ఉగ్రవాద సంస్థలపై పాకిస్థాన్ చిత్తశుద్ధితో కూడిన దృఢమైన వైఖరి అవలంబించాల్సిన అవసరం ఉంది. తిరిగి ఈ ప్రాంతంలో ఉద్రిక్తతలు రేగకుండా తన చర్యలతో పాక్ హామీ ఇవ్వాలి. అలాకాకుండా, మరొక్కసారి భారత్ పై ఉగ్రదాడి జరిగితే పరిస్థితులను అదుపుచేయడం ఎవరివల్లా కాదు. కానీ, పాక్ ఇటీవలే ఉగ్రవాద సంస్థలపై ప్రాథమిక చర్యలు తీసుకుంటున్నట్టు కనిపిస్తోంది. అది సరిపోదు. మరిన్ని కఠిన చర్యలు తీసుకోవాలి. ఇకమీదట ఏంచేయాలన్నది పాకిస్థానే తేల్చుకోవాలి" అంటూ వైట్ హౌస్ సీనియర్ అధికారి ఒకరు పేర్కొన్నారు.