ఆకాశవాణి న్యూస్‌రీడర్‌ ఏడిద గోపాలరావు మృతి

[kakatiya]

ఆకాశవాణి న్యూస్‌రీడర్‌ ఏడిద గోపాలరావు మృతి

బోరబండ, న్యూస్‌టుడే: ఆకాశవాణి కొత్త దిల్లీ కేంద్రంగా వార్తలు చదివిన ఏడిద గోపాలరావు (83) గురువారం ఉదయం కన్నుమూశారు. హఫీజ్‌పేట గోపాల్‌నగర్‌లోని తనయుడి నివాసంలో ఆయన తుదిశ్వాస విడిచారు. రేడియో న్యూస్‌రీడర్‌గా తెలుగు ప్రజలకు చిరపరిచితుడైన ఆయన వార్తలు చదవడం ద్వారా మాత్రమే కాకుండా రంగస్థల నటుడిగాను పేరు ప్రఖ్యాతులు సంపాదించారు. 1965లో ఆకాశవాణిలో చేరిన ఆయన రంగస్థల గాంధీగా పేరుగాంచారు. గోపాలరావుకు భార్య, కుమారుడు శ్యామ్‌రాజా ఉన్నారు. ఆయన కుమార్తె మెహర్‌ 2012లో మృతి చెందారు. సోదరుడు ప్రముఖ నిర్మాత ఏడిద నాగేశ్వరరావు, వి.బి.రాజేంద్రప్రసాద్‌తో కలిసి కాకినాడలో నాటకాలు వేసేవారు. నేతాజీ నాటకంలో గాంధీ వేషం వేసిన ఆయన గాంధీ ప్రధానపాత్రగా ‘బాపూ చెప్పిన మాట’ నాటికను తనకు 70 ఏళ్లు వచ్చేవరకు దాదాపు వందసార్లు ప్రదర్శించారు. అనంతరం మతిమరపు రావడంతో ఆ ప్రయత్నానికి స్వస్తి చెప్పారు. ఏడిద గోపాలరావు అంత్యక్రియలు గచ్చిబౌలిలోని మహాప్రస్థానంలో గురువారం సాయంత్రం జరిగాయి.
కుటుంబ సభ్యులకు సీఎం కేసీఆర్‌ సానుభూతి
ప్రముఖ రేడియో న్యూస్‌రీడర్‌ ఏడిద గోపాలరావు మృతిపై ముఖ్యమంత్రి కేసీఆర్‌ విచారం వ్యక్తం చేశారు. ఆయన కుటుంబ సభ్యులకు ప్రగాఢ సానుభూతి తెలిపారు. రేడియోలో వార్తలు చదవడం ద్వారా మాత్రమే కాకుండా రంగస్థల నటుడుగా ఆయన గుర్తింపు పొందారని, వివిధ సాంస్కృతిక సంస్థలు, సంఘాల కార్యక్రమాలకు సహాయ సహకారాలు అందించారన్నారు.
ఏపీ సీఎం జగన్‌ దిగ్భ్రాంతి
ఆకాశవాణిలో వార్తా వ్యాఖ్యాతగా రాష్ట్ర ప్రజలందరికీ సుపరిచితులైన ఏడిద గోపాలరావు మృతిపై ఏపీ ముఖ్యమంత్రి జగన్‌ దిగ్భ్రాంతి వ్యక్తం చేశారు.  ఆకాశ వాణి శ్రోతలను మెప్పించిన ఆయన మరణం విచారకరమని ఒక ప్రకటనలో జనసేన అధినేత పవన్‌ పేర్కొన్నారు

[kreole]

Rip thatha.

[WigsandThighs]